■大圓燈加上低矮車身，甚具老爺跑格。

跑車是富裕社會下的副產品，相信好多人會舉腳贊成，跑車馬力大但耗油量高，且實際用途唔多夠，唔好講話唔載得多人，想搵地方擺多件隨身物品都唔容易。如果有款車既有跑車樂趣又實際，你話幾好，難怪英國名驅 MGB GT於上世紀六十年代出現，今時今日都有唔少追隨者。

輝煌賣出 520,000部
MG將這款小跑車定名為 MGB，很自然想到是源自同門兄弟 MGA，其實作為第一代 MGA，已經是 1955年的事，當時其嶄新車形及性能，絕對夠創新！不過講到受歡迎，就唔及第二代，於 1962年才投產的 MGB，當年車廠只提供開篷版，直至 1965年才正式生產硬頂版。 MGB生產期長達 18年，至 1980年才停產，其間賣出超過 52萬部，簡直為 MG創造了一段輝煌歷史。


■上世紀設計，錶板唔玩浮誇，平實最緊要。


■以黑色為主調的內櫳，保養光鮮。

圓碌頭燈　搶眼外形
MGB GT當年之所以咁受追捧，無非因為它是一款既具實用性又具風格的小跑車，大圓頭燈搶眼到極，車身採用 Hatchback 2+2座位設計，計晒風阻系數，仲有尾廂都有不錯的儲物空間。講到性能，以當年水平嚟講都唔屬於 Supercar一族，動力配置只用一副 1.8公升直四引擎，輸出最大馬力只得 95匹，不過最高時速可以去到 170km，絕對可說是小辣椒，來到今時今日，它已經有幾十年車齡，要求唔好咁高啦！


■有個大尾廂，令小跑車實用性提升。


■唔想夏天揸車出街會中暑，車主喺車廂加把風扇。


■波箱台採用的是貨真價實的金屬物料，唔同𠵱家嘅電鍍。


■後排是直角式設計座椅，坐得耐難免有啲辛苦。

少有自動波

■揸車唔想焗親，惟有靠車側可調校角度的小窗。

眼前 MGB於 1973年出產，最矜貴之處不只夠老爺，而是唔使推棍推餐飽，用自動波，啱晒唔慣揸手波又想過老爺車癮的車主。如果想平平哋玩老爺車，它絕對啱你 Budget，因產量高，經過幾十年歷史，市場都有不少二手貨，喺英國 Bid返嚟，一般質素的唔使十萬元。
呢位車主將車 Bid返嚟後，都經過一系列大執工程，引擎經過重新翻新，難怪打開頭冚後，引擎好似新嘅一樣，內櫳雖以黑色為主，不過無論錶板及波箱台都採用不少原始味十足的金屬飾面，夠晒 Classic！不過夏天揸就較辛苦，車內雖附有風口位，不過只出暖風，冷氣欠奉，惟有靠駕駛席兩側的雞翼窗調校角度，將風撞入車廂，再駁把風扇，總算凉快啲。

MGB GT


引擎： 1,798cc直四
馬力： 95hp/5,400rpm
傳動： 4前速自動波
售價：$80,000-$100,000（視質素而定）
[節錄...]

來源:蘋果日報網站