打開港聞版，又遞補機制又遊行，娛樂版唔係鋒芝爭囝就係 CK大肚撇男友，負面新聞一籮籮，港人實在需要笑一笑。揸住 VW新甲蟲踩入旺角金魚街，可愛造型加哈哈笑拉花，逗得路人個個邊望邊笑， 6歲到 60歲都咁受落。開心，其實好簡單。

男女老幼笑住

■為測試哈哈笑甲蟲魅力，周末帶埋靚女睇金魚，踩入逼爆嘅旺角金魚街。

早排 VW搞咗個「 SMiLE HK」活動，一行 9架新甲蟲以笑為主題，拉晒七彩鮮艷兼唔同圖案嘅拉花，四出遊行，為香港打打氣。見到全部車出晒牌，我第一時間要求車廠商借作長測，當然揀番全場唯一一款開篷 Cabriolet，雖然顏色同拉花相比較低調，不過車頭一大個「單眼哈哈笑」拉花，已令整架甲蟲相當逗趣。
揸入港九幾個旺區，矚目程度絕對唔輸蝕畀幾百匹嘅辣車，尤其周末揸入旺角金魚街，係咁意泊喺路邊，已即時引嚟全街人注意，唔計企到遠一遠先敢舉機影 Model嘅一班 MK男，好多女仔都主動行埋嚟，用 iPhone同甲蟲拍照，當然小朋友對其渾圓外形充滿好奇，連金魚都唔睇，眼定定咁望住架哈哈笑甲蟲，我哋諗住影相做街訪， o靚仔們隨即勁怕羞，係咁拉住媽咪隻手嗌走，實在可愛到不得了。


■梁小姐猛讚甲蟲好 Cute好靚，男友就猛𥄫 Model……隔籬架甲蟲。


■居然有小朋友對我呢個鬍鬚佬揮手，當然我都知佢只係畀面架甲蟲。


■「媽咪，龜呀！」「甲蟲嚟 o架，儍仔！」


■台灣嚟嘅蕭先生，拎部相機出嚟瘋狂影相，仲問台灣有冇得賣。


■妹妹好想攞 Crztal手上嘅 Beetle「笑笑扇」，但又勁怕羞，好可愛。


■兩姊妹本來扭緊媽咪計要買魚，望到甲蟲後有共同話題，識笑番。

細車竟可容納高佬

■ VW HK特意拉上哈哈笑車花，令新甲蟲更形親切可愛。

可愛造型、哈哈笑拉花，只係一試新甲蟲嘅吸引力，今次試車，開篷先係我着眼點。翌日第二站，陽光稍稍收斂，索性開住篷，走番轉港島泳灘大遊行， 115匹馬力唔算好澎湃，但負載甲蟲重量已經好足夠，在直路爆發時，迎面急風撲臉，吹得好凉爽好舒服，不單止在遇着燈位、慢車時，令我更清楚感受到路人同泳客嘅目光，每當淡淡海水鹹味撲入鼻、又或經過石澳索到聞名嘅炸雞髀香味時，都令我感受到真真正正嘅遊車河享受。
幾日下來，闊落空間令人有驚喜，最主要係 Headroom夠高，揸細車都唔會有壓迫感，對我呢類 6呎高佬嚟講，實在舒服過好多四門私家車。老編嫌佢後座太逼，而我實地試過由北角至深井，來回都坐喺後座嘅經驗，對腳只需擺側啲就無問題，一樣可以輕輕鬆鬆玩 iPad同瞓覺，絕對唔係齋睇唔用嘅 Dog Seat。


■前方玻璃又大又闊，擋風之餘視野亦更廣。


■佈局唔花巧，整個駕駛感覺簡約又討好。


■開住篷由大老山直踩馬鞍山， Crztal比我更 High。


■米白色內櫳望落已經好順眼，軟熟皮椅亦令人坐得好舒適。

New Beetle Cabriolet 2.0

引擎： 1,984cc直四
馬力： 115PS/5,400rpm
扭力： 172Nm/3,200rpm
傳動： 6速+/-波箱
售價：$238,800
[節錄...]

來源:蘋果日報網站