■充滿力量的 Countryman遊走昂船洲大橋時更加爽快無比。

每個網球手夢寐以求的冠軍目標——大滿貫，不過我最近所迷戀的大滿貫是《團圓》入面的常家滿，食量驚人的大食妹，性格爽朗又率直，不拘小節的豪邁角色甚討人歡心，但有時發起脾氣上來就唔係人咁品。諗諗吓，常家滿各方面的特點都幾似呢兩日與我為伴 MINI Countryman，呢架 MINI之冠更得我歡心呢！

直腸直肚的力量

■特大 Xenon白光頭燈於晚間時更耀眼。

近排無記的劇集幾啱我口味，搞到我每逢放假就日日足不出戶上網追睇番錯過的集數，不過面對雨後初現的藍天白雲，又難得有機會借來 Cooper S Countryman ALL 4長測，實在忍不住四出遊蕩跟陽光玩遊戲。想發揮 Cooper S的 1.6公升 Turbo引擎極限，路闊車少風景佳的三號幹線及昂船洲大橋絕對係最好選擇。雖然呢部大碼 MINI的車身長闊高達 4,110× 1,789× 1,561mm，不過它的 184匹馬力、 240Nm扭力輸出完全無損 MINI固有的動感駕駛感覺。 Countryman即使受車重 1,780kg的影響，令操控感覺相比 Cooper較重，但起動反應依然超爽快，一踩油門力量即到，加上偏實的軚感夠晒敏感，四驅的力量和偏硬的懸掛所帶來的紮實，於橋上飛馳時辣㷫唔少車，跟直腸直肚的大滿貫一樣火爆。不過值得一提就係迫力反應同樣敏感，試過稍一不留神大力踩迫力煞停，感覺都幾 Chok。

大食尾廂夠實用

■ Turbo引擎令雙出死氣喉發出沉實而響亮的聲音。

好多男人都怕高身車，嫌懸掛軟軚感輕因而操控樂趣欠奉，呢部 Countryman定位為 SAV，懸掛確實比想像中硬，而軚感亦實到怕你返唔到轉頭揸番你部舒適房車。雖然夠晒好玩，但駕駛初段確要點時間適應，因為一來駕駛視線偏窄，二來你會感到正在操控一部身形不小的車。起初以為 Cooper S版的油耗都唔平，大部份時間保持二千轉的轉數令油針唔算跌得快，平日需約$1.4/公里，若啟動了反應更快的 Sport模式，油耗亦明顯加快，唔好成日開呀！
Countryman確實吸納唔少求實用的香港人，四門設計方便老人家上落，其次係五座設計感覺化算啲，最後當然係尾廂容量大咗。作為三日用家，感受到坐多個人真係熱鬧啲，遊車河都開心啲，朋友們都大讚後座闊落舒適，摺合後排椅背後的 1,170公升儲物容量確實大食，幾個大行李箱都吞得落。


■大圓錶板可愛，功能鍵集中設於中控台。


■最大可增至 1,170公升的儲物空間，剔走低實用的形象。


■路軌有防跣膠面設計，方便擺放碎銀及電話。


■朋友大讚第一次坐 MINI的後座如此闊落。

Cooper S Countryman ALL 4

■高度達 1,561mm的車身無礙入彎時的重心。

引擎： 1,598cc直四 Turbo
馬力： 184ps/5,500rpm
扭力： 240Nm/1,600-5,000rpm（ 260Nm w/Overboost）
傳動：六前速自動波
[節錄...]

來源:蘋果日報網站